مدینہ منورہ کے طیبہ پاور اسٹیشن پر حوثی حملے کی پاکستان کی شدید مذمت

ترجمان دفتر خارجہ سفیر سجاد حیدر خان کی جانب سے جاری بیان میں کہا گیا کہ مسجد نبوی ﷺ کو بجلی فراہم کرنے والے شہری بنیادی ڈھانچے کے خلاف یہ قابل مذمت حملہ سنگین اشتعال انگیزی ہے اور دنیا بھر کے کروڑوں مسلمانوں کے لیے گہری تشویش اور رنج کا باعث ہے۔ بیان میں کہا گیا کہ حرمین شریفین کی حرمت اور زائرین و عمرہ زائرین کی سلامتی کا ہر حال میں احترام کیا جانا چاہیے۔

سجاد حیدر خان نے کہا کہ پاکستان ایسی بے لگام کارروائیوں کے فوری اور غیر مشروط خاتمے کا مطالبہ کرتا ہے، جو علاقائی امن و سلامتی کے لیے بھی سنگین خطرہ ہیں۔

انہوں نے کہا کہ پاکستان سعودی عرب کے ساتھ اپنی غیر متزلزل یکجہتی کا اعادہ کرتا ہے اور مملکت کی خودمختاری، علاقائی سالمیت اور سلامتی کی مکمل حمایت کرتا ہے۔ پاکستان حرمین شریفین کے تحفظ، اپنے عوام کی حفاظت اور زائرین کی سلامتی یقینی بنانے کی سعودی کوششوں کے ساتھ مضبوطی سے کھڑا ہے۔

بیان کے اختتام پر کہا گیا کہ پاکستان خطے میں دیرپا امن و استحکام کے حصول کے لیے تمام کوششیں جاری رکھے گا۔