آزاد کشمیر حکومت کا بڑا انتظامی اقدام، سات افسران کے تبادلے اور تعیناتیوں کے احکامات

مظفرآباد: آزاد جموں و کشمیر حکومت نے انتظامی امور میں بہتری کے لیے سات افسران کے تبادلے اور نئی تعیناتیوں کے احکامات جاری کر دیے ہیں۔ نوٹیفکیشن کے مطابق کئی اضلاع کے ڈپٹی کمشنروں سمیت اہم انتظامی عہدوں پر تبدیلیاں کی گئی ہیں۔

تفصیلات کے مطابق عاصم خالد اعوان کو ڈپٹی کمشنر باغ سے تبدیل کر کے ڈپٹی کمشنر مظفرآباد تعینات کیا گیا ہے، جبکہ سید ممتاز حسین کاظمی ڈپٹی کمشنر پونچھ سے ڈپٹی کمشنر باغ مقرر ہوئے ہیں۔ فیصل مغل کو ڈپٹی کمشنر وادی جہلم سے ڈپٹی کمشنر بھمبر تعینات کیا گیا ہے۔

منیر احمد قریشی کو ڈپٹی کمشنر مظفرآباد کے عہدے سے ہٹا کر ڈپٹی سیکرٹری ہائیر ایجوکیشن تعینات کیا گیا ہے۔ عفت اعظم کو ایڈیشنل ڈپٹی کمشنر کوٹلی سے ڈپٹی کمشنر وادی جہلم مقرر کیا گیا ہے، جبکہ چوہدری محمد طارق ڈپٹی کمشنر بھمبر سے ڈائریکٹر انڈسٹریز اینڈ کامرس تعینات ہوئے ہیں۔

محمد رضا اللہ خان کو ڈائریکٹر انڈسٹریز اینڈ کامرس کے عہدے سے ہٹا دیا گیا ہے اور انہیں کوئی نئی تعیناتی نہیں دی گئی۔ حکومتی ذرائع کے مطابق یہ تبادلے انتظامی اصلاحات کے تسلسل کا حصہ ہیں۔

واضح رہے کہ وزیراعظم آزاد کشمیر بیرسٹر افتخار گیلانی کی حکومت نے حال ہی میں اختیاری عہدوں کے خاتمے اور مالیاتی اصلاحات کی جانب بھی اہم اقدامات کیے ہیں۔