شہباز شریف اور فضل الرحمان ملے، کشیدگی کم کرنے پر گفتگو

وزیراعظم محمد شہباز شریف نے جمعے کے روز جمعیت علمائے اسلام (ف) کے سربراہ مولانا فضل الرحمان سے ٹیلی فونک رابطہ کیا، جس میں ملکی مجموعی سیاسی صورتحال پر تفصیلی گفتگو ہوئی۔ ذرائع کے مطابق وزیراعظم نے بتایا کہ وفاقی حکومت مسائل کو سیاسی طریقے سے حل کرنے کی ہر ممکن کوشش کر رہی ہے۔ مولانا فضل الرحمان کا کہنا تھا کہ سیاسی اختلافات کا حل مذاکرات اور باہمی افہام و تفہیم میں ہے، نہ کہ تصادم میں۔ رابطے میں خیبرپختونخوا کی صورتحال اور پی ٹی آئی کے لانگ مارچ پر بھی بات چیت ہوئی۔

وزیراعظم ہاؤس میں وفد کے ہمراہ ملاقات

ہفتے کی شب مولانا فضل الرحمان وزیراعظم کی دعوت پر جے یو آئی (ف) کے وفد کے ہمراہ وزیراعظم ہاؤس پہنچے، جہاں اہم قومی و سیاسی امور پر مشاورت ہوئی۔ وزیراعظم آفس سے جاری بیان کے مطابق مولانا فضل الرحمان نے وفاقی حکومت اور خیبرپختونخوا حکومت کے درمیان کشیدگی کم کرنے کے حوالے سے گفتگو کی۔ وفد میں سینیٹر مولانا عطاء الحق درویش، مولانا لطف الرحمان اور سینیٹر کامران مرتضیٰ شامل تھے۔ جے یو آئی کے ترجمان اسلم غوری نے تصدیق کی کہ ملاقات میں موجودہ سیاسی صورتحال اور وفاق و صوبے کے درمیان جاری تناؤ پر تبادلہ خیال ہوا۔

ترجمان کے مطابق وزیراعظم ہاؤس روانگی سے قبل مولانا فضل الرحمان نے تحریک انصاف کی قیادت کو بھی اعتماد میں لیا تھا۔ ان کا کہنا تھا کہ مولانا فضل الرحمان پی ٹی آئی کی قیادت کے ساتھ مسلسل رابطے میں ہیں اور یہ رابطے سیاسی تناؤ کم کرنے کی کوششوں کا حصہ ہیں۔ دوسری جانب پی ٹی آئی کے سیکرٹری اطلاعات شیخ وقاص اکرم نے کہا کہ پارٹی ملک میں جاری سیاسی تناؤ اور غیر یقینی صورتحال کم کرنے میں مولانا فضل الرحمان کے مثبت کردار کا خیرمقدم کرے گی۔ ان کا کہنا تھا کہ موجودہ چیلنجز کا حل سیاسی تدبر، صبر اور تصادم کے بجائے مذاکرات میں ہے۔

انسدادِ دہشتگردی اولین ترجیح قرار

وفاقی وزیر برائے پارلیمانی امور ڈاکٹر طارق فضل چوہدری نے پارلیمنٹ ہاؤس میں سینئر صحافیوں سے گفتگو میں کہا کہ حکومت کی سب سے بڑی ترجیح خیبرپختونخوا میں دہشتگردی پر قابو پانا ہے، جبکہ لانگ مارچ سے نمٹنے کی تمام تیاریاں مکمل ہیں۔ ان کا کہنا تھا کہ ملک کسی تصادم کا متحمل نہیں ہو سکتا اور استحکام ناگزیر ہے۔ انہوں نے پی ٹی آئی کی قیادت پر زور دیا کہ وہ انسدادِ دہشتگردی کی کوششوں میں وفاقی حکومت کا ساتھ دے۔

ایوانِ صدر میں بھی اہم مشاورت

اسی دوران صدر آصف علی زرداری اور وزیراعظم شہباز شریف کے درمیان ایوانِ صدر میں ملاقات ہوئی، جس میں مجموعی سیاسی و سیکیورٹی صورتحال پر تبادلہ خیال کیا گیا۔ ایوانِ صدر کی جانب سے جاری بیان کے مطابق اجلاس میں منگل کے روز قومی اسمبلی اور سینیٹ کے علیحدہ اجلاس بلانے پر اتفاق کیا گیا۔ ملاقات میں نائب وزیراعظم اسحاق ڈار اور وفاقی وزیر داخلہ محسن نقوی سمیت اعلیٰ حکام شریک تھے۔

واضح رہے کہ جے یو آئی (ف) کی مرکزی مجلسِ عاملہ نے بھی مولانا فضل الرحمان کی صدارت میں سیاسی صورتحال کا جائزہ لیا اور اس بات پر زور دیا کہ موجودہ حالات کو باہمی افہام و تفہیم سے حل کیا جائے۔ ادھر پی ٹی آئی رہنما علی محمد خان نے قومی اسمبلی کے اسپیکر سردار ایاز صادق سے رابطہ کر کے مذاکرات کے تیسرے دور کی ضرورت پر زور دیا۔