سربراہ پاک بحریہ: جنگی صلاحیتوں میں غیر معمولی اضافہ، ہر جارحیت کا منہ توڑ جواب دیں گے

سربراہ پاک بحریہ ایڈمرل نوید اشرف پی اے ایف اکیڈمی اصغر خان رسالپور میں گریجویشن پریڈ سے خطاب کر رہے ہیں۔

Written by

in

رسالپور — سربراہ پاک بحریہ ایڈمرل نوید اشرف نے کہا ہے کہ پاک بحریہ نے تمام آپریشنل شعبوں میں اپنی جنگی صلاحیتوں کو غیر معمولی حد تک بڑھا لیا ہے اور مسلح افواج کسی بھی جارحیت کا منہ توڑ جواب دینے کی بھرپور صلاحیت رکھتی ہیں۔

ایڈمرل اشرف نے جمعرات کو پاکستان ایئر فورس اکیڈمی اصغر خان رسالپور میں گریجویشن اور پاسنگ آؤٹ پریڈ سے بطور مہمانِ خصوصی خطاب کرتے ہوئے کہا کہ بحریہ اپنے بحری بیڑے کو جدید خطوط پر استوار کرنے کی جانب تیزی سے گامزن ہے۔ انہوں نے جدید ترین جنگی جہازوں، ہنگور کلاس آبدوزوں، مقامی طور پر تیار کردہ طویل فاصلے تک مار کرنے والے ہتھیاروں اور بغیر پائلٹ کے نظام کی شمولیت کا حوالہ دیا اور پاکستان میری ٹائم سائنس اینڈ ٹیکنالوجی پارک کے قیام کو اہم سنگِ میل قرار دیا۔

نیول چیف نے بتایا کہ پاک بحریہ کے بیڑے میں مجموعی طور پر 8 ہنگور کلاس آبدوزیں شامل کی جا رہی ہیں۔ اس سلسلے کی پہلی آبدوز رواں سال جون میں کراچی پورٹ پہنچی تھی جس نے ستمبر میں بحیرہ عرب میں پہلی بار براہِ راست ہتھیار فائر کرنے کا کامیاب مظاہرہ کیا۔

دفاعی خود انحصاری کا ذکر کرتے ہوئے ایڈمرل اشرف نے کہا کہ رواں سال اپریل کے وسط میں مقامی سطح پر تیار کردہ اینٹی شپ بیلسٹک میزائل کا کامیاب تجربہ کیا گیا، جبکہ چند روز بعد مقامی اینٹی شپ ویپن سسٹم ‘تیمور’ کو بھی کامیابی سے آزمایا گیا۔ اس سے قبل گزشتہ برس نومبر میں بھی بحری جہاز سے داغے جانے والے مقامی اینٹی شپ بیلسٹک میزائل کا کامیاب تجربہ کیا جا چکا ہے۔

انہوں نے کہا کہ جدید جنگ کی نوعیت ڈرامائی طور پر تبدیل ہو چکی ہے اور اب جنگیں محض روایتی میدانوں تک محدود نہیں رہیں بلکہ الیکٹرانک وارفیئر، سائبر، خلائی اور ادراکی شعبوں تک پھیل چکی ہیں، جبکہ خودکار نظام، مصنوعی ذہانت اور انفارمیشن وارفیئر نے جنگیں لڑنے اور جیتنے کے انداز کو یکسر بدل کر رکھ دیا ہے۔

علاقائی سلامتی پر بات کرتے ہوئے نیول چیف نے کہا کہ عالمی اور علاقائی تزویراتی ماحول انتہائی پیچیدہ ہو چکا ہے، بالخصوص مشرقِ وسطیٰ میں بڑھتی ہوئی کشیدگی نے صورتحال کو مزید حساس بنا دیا ہے۔ انہوں نے بتایا کہ مشرقِ وسطیٰ کے تنازع کے آغاز پر رواں سال مارچ میں شروع کیا گیا ‘آپریشن محافظ البحر’ تاحال کامیابی کے ساتھ جاری ہے اور پاک بحریہ نہ صرف ملکی ساحلوں بلکہ بین الاقوامی سمندری گزرگاہوں کے تحفظ میں بھی کلیدی کردار ادا کر رہی ہے۔

مئی 2025 کی پاک بھارت کشیدگی کا حوالہ دیتے ہوئے ایڈمرل اشرف نے کہا کہ مسلح افواج ناقابلِ تسخیر ہیں اور کسی بھی جارحیت کو روکنے کی مکمل اہلیت رکھتی ہیں۔ انہوں نے معرکۂ حق میں پاک فضائیہ کی غیر معمولی کارکردگی کو سراہتے ہوئے کہا کہ جنگی تاریخ میں پہلی بار پاک فضائیہ نے کثیر الجہتی آپریشنز کیے جن میں بنیادی طور پر مقامی صلاحیتیں استعمال کی گئیں، جبکہ پاک بحریہ نے اس تنازع کے دوران بھارتی بحریہ کو سمندر میں کسی بھی قسم کی جارحیت سے کامیابی کے ساتھ باز رکھا اور دشمن پورے معرکے میں پسپا رہا۔

نیول چیف نے دوٹوک الفاظ میں کہا کہ ‘مجھے یقین ہے کہ ہمارے دشمن نے سبق سیکھ لیا ہے اور اسے دوسرے سبق کی ضرورت نہیں پڑے گی۔’

انہوں نے فضائیہ اور بحریہ کو ‘برادرانِ اسلحہ’ قرار دیتے ہوئے کہا کہ سمندری حدود ان کا مشترکہ آپریشنل میدان ہے، جہاں وہ مل کر مشقیں کرتے ہیں اور مادرِ وطن کے دفاع کے لیے شانہ بشانہ لڑیں گے۔

ایڈمرل اشرف نے کہا کہ پاکستان ایک امن پسند ملک ہے جو ہمیشہ تحمل، مذاکرات، سفارت کاری، علاقائی استحکام اور عالمی امن کو ترجیح دیتا ہے، تاہم وہ اپنے وطن کا دفاع کرنا بخوبی جانتا ہے۔ انہوں نے پریڈ میں ترک فضائیہ کے سربراہ جنرل رفت دالکیران کی شرکت کا خیرمقدم کرتے ہوئے کہا کہ پاکستان کو ترکیہ کے ساتھ اپنی آزمودہ دوستی پر فخر ہے۔

Comments

Leave a Reply

Your email address will not be published. Required fields are marked *