وفاقی آئینی عدالت نے جائیداد اور وراثت کی تقسیم سے متعلق ایک دیرینہ تنازع پر اہم تحریری فیصلہ جاری کرتے ہوئے قرار دیا ہے کہ وراثت کے انتقال کی درستگی یا محض تکنیکی غلطیاں کسی بھی وارث کو اس کے شرعی حصے سے محروم نہیں کر سکتیں۔
چیف جسٹس امین الدین خان کی جانب سے تحریر کیے گئے 11 صفحات پر مشتمل فیصلے میں عدالت نے لاہور ہائیکورٹ کا فیصلہ برقرار رکھتے ہوئے دائر کی گئی تمام اپیلیں خارج کر دیں۔
تحریری فیصلے میں قرار دیا گیا ہے کہ وراثت کی تقسیم میں قرابت داری اور خونی رشتے کا اکیلے اطلاق نہیں ہوتا، اور نہ ہی براہِ راست مرد وارث نہ ہونے کی صورت میں کوئی بھی قریبی رشتہ دار خود بخود حقدار بن جاتا ہے، بلکہ جائیداد کی تقسیم اسلامی قانونِ وراثت اور مقررہ قانونی زمروں کے تحت ہی عمل میں لائی جائے گی۔
عدالت نے واضح کیا کہ بیوہ اور بہنوں کے مقررہ شرعی حصوں کی تقسیم کے بعد بچنے والی جائیداد پر ‘عصبہ’ یعنی قانونی مرد رشتہ دار کا حق ہوگا، اور قانونی عصبہ کی موجودگی میں ‘رد’ کا اصول نافذ نہیں کیا جا سکتا۔
اس مقدمے میں وفاقی آئینی عدالت نے قرار دیا کہ شرعی مقررہ حصص کی تقسیم کے بعد بقیہ حصہ متوفی کے چچازاد بھائی کا بنے گا، اور چچازاد بھائی کا قانونی دعویٰ درست قرار دے دیا۔ عدالت نے مزید کہا کہ محض ریونیو انٹریز یا کاغذی فارملٹیز سے کسی کا اصل شرعی حق تبدیل نہیں ہوتا۔

Leave a Reply