Tag: کراچی

کم عمر لڑکی کے مبینہ جنسی استحصال اور انسانی اسمگلنگ کے سنگین خدشات — موبائل سے ایجنٹ سے رابطوں کے شواہد بھی برآمد

کراچی کے جناح انٹرنیشنل ایئرپورٹ پر ایف آئی اے امیگریشن نے انسانی اسمگلنگ کے شبے میں بڑی کارروائی کرتے ہوئے متحدہ عرب امارات جانے والی تین خواتین مسافروں کو جہاز سے اتار لیا۔

ذرائع کے مطابق امیگریشن حکام نے دو بہنوں اور ان کی والدہ کی سفری دستاویزات اور سفر کے مقصد کی باریک بینی سے جانچ کی، جس دوران ایک کم عمر لڑکی کے مبینہ جنسی استحصال سے متعلق سنگین خدشات سامنے آئے۔

امیگریشن کلیئرنس کے دوران مسافر خواتین مائرہ، علیشہ اور ان کی والدہ بینہ سے سفر کے مقصد اور انتظامات کے بارے میں تفصیلی سوالات کیے گئے۔ اس دوران مائرہ نے اپنی عمر سولہ سے سترہ برس بتائی اور دعویٰ کیا کہ والدین نے پاسپورٹ اور شناختی کاغذات میں اس کی عمر اصل سے زیادہ درج کرائی۔

لڑکی نے مزید الزام لگایا کہ اسے متحدہ عرب امارات میں کلبوں اور ہوٹلوں میں جنسی سرگرمیوں میں ملوث کیا گیا تھا۔

ابتدائی تفتیش میں مسافروں کی والدہ کے موبائل فون سے مبینہ ایجنٹ حارث کے ساتھ واٹس ایپ پر ہونے والی گفتگو بھی برآمد ہوئی، جس میں ویزوں، فضائی ٹکٹوں اور سفری اخراجات کے بندوبست پر تبادلہ خیال کیا گیا تھا۔ پیغامات میں لڑکیوں کی ماہانہ آمدن چھ لاکھ روپے تک بڑھانے اور دیگر لڑکیوں کے بارے میں بات چیت کا بھی ذکر ملا، جس کی تصدیق اور فرانزک جانچ ابھی باقی ہے۔

حکام کے مطابق مبینہ ایجنٹ نے مسافروں کے سفری انتظامات میں مالی مدد بھی کی۔ والدہ کے موبائل سے چار لاکھ روپے کی بینک ٹرانزیکشن کی رسید بھی ملی جو مبینہ طور پر ان کے والد مقصود علی کے کھاتے میں بھیجی گئی تھی۔ ان رقوم کی نوعیت اور مقصد کی مزید چھان بین جاری ہے۔

جانچ کے دوران ایجنٹ حارث، متعلقہ ٹریول ایجنسی، سفری کاغذات، بینک کھاتوں اور موبائل فونز میں موجود ڈیجیٹل شواہد سے متعلق اہم معلومات بھی سامنے آئیں۔

حکام نے دیگر ممکنہ متاثرہ لڑکیوں کی شناخت، مالی روابط، ماضی کے سفری بندوبست اور والدین سمیت تمام متعلقہ افراد کے کردار کی تصدیق کو ناگزیر قرار دیا ہے۔

معاملے کی سنگینی دیکھتے ہوئے تینوں مسافروں کو مزید تصدیق، ڈیجیٹل شواہد کے فرانزک تجزیے اور قانونی کارروائی کے لیے ایف آئی اے کے انسداد انسانی اسمگلنگ حکام کے حوالے کر دیا گیا ہے۔

مبینہ انسانی اسمگلنگ، کم عمر لڑکی کے ممکنہ جنسی استحصال اور سہولت کاروں کے کردار کی مزید تحقیقات جاری ہیں۔

محکمہ موسمیات نے پیشگوئی کی ہے کہ کراچی میں آئندہ 24 گھنٹوں کے دوران موسم خشک اور گرم رہے گا جبکہ رات کے درجہ حرارت میں کمی متوقع ہے۔ دی نیشن کی رپورٹ کے مطابق محکمہ موسمیات نے اتوار کو بتایا کہ کراچی میں ہواؤں کا رخ تبدیل ہو کر شمال مشرق کی جانب ہو گیا ہے اور شہر میں موسم سرما سے پہلے کا موسم شروع ہو گیا ہے۔

ماہرین موسمیات کے مطابق کراچی میں کم سے کم درجہ حرارت 24.3 ڈگری سینٹی گریڈ ریکارڈ کیا گیا جبکہ دن کے وقت پارہ 35 ڈگری تک جانے کی پیشگوئی ہے۔ ہوا میں نمی کا تناسب 78 فیصد ریکارڈ کیا گیا۔ محکمہ موسمیات کا کہنا ہے کہ اکتوبر اور نومبر کے مہینوں میں بارش کے امکانات کم ہیں اور کراچی میں موسلا دھار بارش کا کوئی امکان نہیں۔

ملک بھر میں خشک موسم

محکمہ موسمیات کے مطابق ملک کے میدانی علاقوں میں موسم بنیادی طور پر خشک رہے گا جبکہ پہاڑی علاقوں میں راتیں اور صبحیں سرد رہیں گی۔ لاہور میں بھی خشک موسم کی پیشگوئی کی گئی ہے جہاں زیادہ سے زیادہ درجہ حرارت 32 ڈگری سینٹی گریڈ ریکارڈ کیا گیا۔

ملک بھر میں سب سے زیادہ درجہ حرارت 37 ڈگری سینٹی گریڈ شہید بینظیر آباد، نوکنڈی، سبی اور روہڑی میں ریکارڈ کیا گیا۔ محکمہ موسمیات کے مطابق 6 اکتوبر کو بالائی خیبر پختونخوا، گلگت بلتستان، کشمیر اور پوٹھوہار میں کہیں کہیں بارش اور گرج چمک کا امکان ہے جبکہ باقی ملک میں موسم خشک رہے گا۔

محکمہ موسمیات کے ہفتہ وار جائزے کے مطابق 6 اکتوبر کو بالائی خیبر پختونخوا، گلگت بلتستان، کشمیر اور پوٹھوہار میں کہیں کہیں بارش اور گرج چمک کا امکان ہے جبکہ 8 اکتوبر کو بالائی خیبر پختونخوا، گلگت بلتستان اور کشمیر میں موسم خراب رہ سکتا ہے۔ باقی ملک میں موسم خشک رہنے کی توقع ہے۔

محکمہ موسمیات کے اکتوبر کے ماہانہ جائزے کے مطابق رواں ماہ ملک بھر میں اوسط درجہ حرارت معمول سے زیادہ رہنے کا امکان ہے، جس میں گلگت بلتستان اور مغربی بلوچستان میں سب سے زیادہ اضافہ متوقع ہے۔ ماہرین نے شہریوں کو دن کے وقت دھوپ سے بچنے اور پانی کے زیادہ استعمال کی ہدایت کی ہے۔