نجی ٹی وی پروگرام میں سینئر اداکار کی کھل کر بات — ‘عزت دینا کم ہوتا جا رہا ہے، متنازع باتیں تین دن میں دم توڑ جاتی ہیں’
پاکستان کی ڈرامہ اور فلم انڈسٹری کے سینئر اداکار سعود نے اداکارہ نادیہ خان کو آڑے ہاتھوں لے لیا ہے۔ ان کا کہنا ہے کہ نادیہ خان انڈسٹری میں فساد پھیلانے کا باعث بن رہی ہیں۔
سعود نے یہ بات ایک نجی ٹیلی ویژن چینل کے پروگرام میں کہی، جہاں وہ ہلکے پھلکے ماحول میں شریک حاضرین کے سوالات کے جواب دے رہے تھے۔
پروگرام کے دوران ایک خاتون نے سوال اٹھایا کہ آج کل پوڈکاسٹ کا زمانہ ہے اور شہرت کی خاطر لوگ ماضی کی باتیں کریدتے ہیں — اس رجحان پر ان کی کیا رائے ہے؟
جواب میں سعود کا کہنا تھا کہ یہ سلسلہ اب بہت عام ہو چکا ہے اور ایک دوسرے کی عزت کا خیال رکھنا کم ہوتا جا رہا ہے۔ انھوں نے بتایا کہ حال ہی میں ایک انٹرویو دیکھا جس میں ایک خاتون متنازع نوعیت کے سوالات کر رہی تھیں، جو انہیں بالکل پسند نہیں آیا۔
اداکار نے نام لے کر کہا کہ نادیہ خان نے ایک بزنس مین کی صاحبزادی سے بھی اسی انداز میں سوالات کیے۔ ان کے بقول نادیہ خان انڈسٹری میں کافی فساد برپا کر چکی ہیں — پہلے انھوں نے اداکار ہمایوں سعید کے بارے میں بات کی، پھر اداکارہ عتیقہ اوڈھو کو نشانہ بنایا۔ سعود کا دعویٰ تھا کہ وہ سب کے دلوں میں نفرتیں پیدا کرتی ہیں۔
تاہم گفتگو کے اختتام پر سعود نے انڈسٹری کی تعریف بھی کی۔ ان کا کہنا تھا کہ ہماری انڈسٹری بہت اچھی ہے، اس طرح کی متنازع باتیں عارضی ہوتی ہیں اور تین دن بعد خود ہی دم توڑ جاتی ہیں۔