سینیٹر شیری رحمان نے خبردار کیا ہے کہ دنیا کو خالی وعدوں سے آگے بڑھ کر فوری طور پر ایک منصفانہ اور قابلِ رسائی موسمیاتی فنڈنگ کا فریم ورک بنانا ہوگا تاکہ ترقی پذیر ممالک آفات اور قرضوں کے چکر سے نکل سکیں۔ ترکیہ کے شہر انطالیہ میں کوپ 31 موسمیاتی کانفرنس سے خطاب کرتے ہوئے انہوں نے کہا کہ کانفرنس کو موسمیاتی بحران کا سب سے زیادہ بوجھ اٹھانے والے ممالک کے لیے حقیقی مالی مدد فراہم کرنی چاہیے، نہ کہ صرف وعدوں کی فہرست میں اضافہ کرنا چاہیے۔
سینیٹر رحمان نے میزبانی پر ترکیہ کی تعریف کی اور کہا کہ ترکیہ کی کوپ 31 صدارت ترقی یافتہ اور ترقی پذیر ممالک کے درمیان خلیج کو پاٹنے اور کثیر جہتی موسمیاتی اقدامات پر عالمی اعتماد بحال کرنے کا سنہری موقع ہے۔ انہوں نے امید ظاہر کی کہ انطالیہ کانفرنس موسمیاتی یکجہتی کو متاثرہ اقوام کے لیے عملی مالیاتی وعدوں اور معنی خیز فیصلوں میں بدلے گی، نہ کہ محض نئے اعلانات تک محدود رہے گی۔
فوسل فیول کی سب سڈیز اور وسائل کا غلط استعمال
اقوام متحدہ کے سیکرٹری جنرل کے اس انتباہ کا حوالہ دیتے ہوئے کہ فوسل فیول کو اب ڈائنوسارز کی طرح قصہ پارینہ بن جانا چاہیے، سینیٹر شیری رحمان نے زور دیا کہ حکومتیں ایک طرف اس صنعت کو سب سڈیز نہیں دے سکتیں جو خود موسمیاتی بحران کو ہوا دے رہی ہے، جبکہ متاثرہ ممالک کے لیے وسائل کی کمی کا رونا روئیں۔ انہوں نے کہا کہ دنیا موسمیاتی وعدوں اور فوسل فیول کی مسلسل حمایت کے درمیان تضاد کو مزید برداشت نہیں کر سکتی۔
ان کے حوالے کردہ اعداد و شمار کے مطابق عالمی سطح پر فوسل فیول کی سب سڈیز کا تخمینہ لگ بھگ 7 ٹریلین ڈالر ہے، جو وسائل کا انتہائی غیر منصفانہ اور سنگین غلط استعمال ہے، ایسے وقت میں جب فرنٹ لائن ممالک بنیادی موافقت اور بحالی کے لیے فنڈز کی شدید تگ و دو کر رہے ہیں۔ اصل سوال یہ نہیں کہ دنیا کے پاس وسائل ہیں یا نہیں، بلکہ یہ ہے کہ کیا ان وسائل کو درست سمت میں موڑنے کا حقیقی سیاسی عزم موجود ہے۔
بڑھتا ہوا عالمی درجہ حرارت اور 2.7 ڈگری کا خطرناک انتباہ
سینیٹر رحمان نے یہ بھی خبردار کیا کہ عالمی درجہ حرارت تشویشناک رفتار سے بڑھ رہا ہے اور درجہ حرارت میں اضافے کو 1.5 ڈگری سینٹی گریڈ تک محدود رکھنے کا ہدف تیزی سے ہاتھ سے نکل رہا ہے۔ کلائمیٹ ایکشن ٹریکر کے مطابق موجودہ پالیسیوں کے باعث صدی کے اختتام تک دنیا تقریباً 2.7 ڈگری سینٹی گریڈ حرارت کی طرف گامزن ہے، جو پچھلے تخمینے 2.6 ڈگری سے بھی زیادہ ہے۔
انہوں نے کہا کہ 2.7 ڈگری سینٹی گریڈ کا یہ خطرناک رجحان پاکستان جیسے ممالک کے لیے تباہ کن نتائج کا حامل ہوگا، جہاں موسمیاتی شدت پہلے ہی روزگار، خوراک اور پانی کی دستیابی اور معاشی استحکام کو نقصان پہنچا رہی ہے۔ انہوں نے یاد دلایا کہ 2022 کے تباہ کن سیلاب نے پاکستان کے 33 ملین افراد کو براہِ راست متاثر کیا اور لگ بھگ 30 ارب ڈالر کے نقصانات کیے، جبکہ 2025 کے سیلاب سے زرعی شعبے کو ہونے والے نقصانات کا تخمینہ ایک ارب ڈالر لگایا گیا ہے۔
انہوں نے خبردار کیا کہ اس غیرفعالیت کی قیمت انسانی جانوں، بے گھر کمیونٹیز اور دہائیوں پیچھے دھکیلی جانے والی ترقی کی صورت میں چکانی پڑے گی۔
