Tag: سردار میر اکبر خان

  • میر اکبر خان کا میرپور ٹیچنگ ہسپتال کا دورہ، سیپج ختم کرنے کی ہدایت

    میر اکبر خان کا میرپور ٹیچنگ ہسپتال کا دورہ، سیپج ختم کرنے کی ہدایت

    میرپور — آزاد جموں و کشمیر کے وزیر فزیکل پلاننگ اینڈ ہاؤسنگ و باغ ڈویلپمنٹ اتھارٹی سردار میر اکبر خان نے ممبر کشمیر کونسل چوہدری محمد سعید کے ہمراہ ڈویژنل ہیڈ کوارٹر ٹیچنگ ہسپتال میرپور کا دورہ کیا اور ہسپتال کی نئی تعمیر ہونے والی عمارت کا تفصیلی معائنہ کیا۔

    وزیر نے ہسپتال کا تعمیراتی کام جلد مکمل کرنے اور سیپج کا مسئلہ فوری طور پر اور مستقل بنیادوں پر حل کرنے کی ہدایات جاری کیں۔ اس موقع پر متعلقہ کنٹریکٹر بھی ان کے ہمراہ موجود تھے۔

    ہسپتال آمد پر میڈیکل سپرنٹنڈنٹ پروفیسر ڈاکٹر اعجاز احمد راجہ نے وزیر کا استقبال کیا اور انہیں پھولوں کا گلدستہ پیش کیا۔ وزیر نے عمارت کے مختلف حصوں کا تفصیلی معائنہ کیا اور انہیں تعمیراتی کام، منصوبے کی موجودہ پیش رفت، تکمیل کے مراحل اور درپیش چیلنجز کے حوالے سے تفصیلی بریفنگ دی گئی۔

    معائنے کے دوران عمارت کے بعض حصوں میں سامنے آنے والی سیپج کا خصوصی نوٹس لیتے ہوئے وزیر نے متعلقہ کنٹریکٹر کو اس مسئلے کا فوری اور مستقل بنیادوں پر حل یقینی بنانے کی ہدایت کی۔ انہوں نے کہا کہ تعمیراتی کام میں معیار اور پائیداری پر کسی قسم کا سمجھوتہ نہ کیا جائے اور ماندہ کام برق رفتاری کے ساتھ مکمل کرتے ہوئے منصوبے کو جلد پائیہ تکمیل تک پہنچایا جائے۔

    سردار میر اکبر خان نے کہا کہ ہسپتال جیسے مفاد عامہ کے اہم عوامی ادارے کی تعمیر میں معیار، تکنیکی تقاضوں اور مریضوں کی ضروریات کو خصوصی اہمیت دی جائے تاکہ نئی عمارت کی تکمیل سے عوام کو بہتر طبی سہولیات کی فراہمی ممکن ہو سکے۔

    انہوں نے کہا کہ یہ اقدامات وزیراعظم آزاد کشمیر افتخار گیلانی کی حکومت کی ترجیحات کے مطابق صحت کے شعبے کی بہتری، ہسپتالوں میں جدید طبی سہولیات کی فراہمی اور جاری ترقیاتی منصوبوں کی بروقت تکمیل کے عزم کا حصہ ہیں۔

    وزیر نے کہا کہ صحت کے شعبے میں ترقیاتی منصوبوں کی بروقت تکمیل حکومت کی ترجیحات میں شامل ہے اور ٹیچنگ ہسپتال کی نئی عمارت کی تکمیل سے علاقے میں طبی سہولیات کی فراہمی مزید بہتر ہوگی۔

    دورے کے اختتام پر میڈیکل سپرنٹنڈنٹ ڈویژنل ہیڈ کوارٹر ٹیچنگ ہسپتال میرپور پروفیسر ڈاکٹر اعجاز احمد راجہ کی جانب سے وزیر فزیکل پلاننگ اینڈ ہاؤسنگ سردار میر اکبر خان اور ممبر کشمیر کونسل چوہدری محمد سعید کو یادگاری شیلڈز بھی پیش کی گئیں۔

  • آزاد کشمیر: میرپور اور بھمبر میں تصدیق کے بغیر نئی واٹر سپلائی سکیم شروع نہیں ہوگی

    آزاد کشمیر: میرپور اور بھمبر میں تصدیق کے بغیر نئی واٹر سپلائی سکیم شروع نہیں ہوگی

    آزاد کشمیر میں ایک اعلیٰ سطحی اجلاس نے فیصلہ کیا ہے کہ میرپور اور بھمبر کے اضلاع میں دستیاب آبی وسائل کی تصدیق کے بغیر کوئی نئی واٹر سپلائی سکیم شروع نہیں کی جائے گی۔ یہ فیصلہ وزیر برائے فزیکل پلاننگ و ہاؤسنگ سردار میر اکبر خان کی زیر صدارت ہونے والے اجلاس میں کیا گیا، جس میں دونوں اضلاع کے ترقیاتی منصوبوں کا تفصیلی جائزہ لیا گیا۔

    اجلاس میں کیے گئے فیصلوں کے مطابق، کسی بھی نئی سکیم کے آغاز سے قبل آبی وسائل کی تصدیق کی جائے گی، تاکہ منصوبوں کی افادیت اور پائیداری کو یقینی بنایا جا سکے اور عوام کو پانی کی مستقل فراہمی مہیا کی جا سکے۔ اجلاس میں اس بات پر زور دیا گیا کہ نئی سکیمیں صرف اس صورت میں آگے بڑھیں گی جب یہ ثابت ہو جائے کہ ان کے لیے کافی پانی دستیاب ہے۔

    اجلاس میں یہ بھی فیصلہ کیا گیا کہ مرمت و دیکھ بھال کا بجٹ متعلقہ مقامات اور منصوبوں پر ان کی ضروریات کے مطابق خرچ کیا جائے گا۔ حکام نے کہا کہ اس سے سرکاری تنصیبات اور واٹر سپلائی سکیموں کی مؤثر دیکھ بھال اور بروقت مرمت ممکن ہو گی اور موجودہ سہولیات کو فعال حالت میں رکھنے میں مدد ملے گی۔

    اجلاس میں عملے کی معقول تقسیم کا بھی فیصلہ کیا گیا۔ اس اقدام کا مقصد محکمے کی کارکردگی کو بہتر بنانا اور دستیاب افرادی قوت کا بہتر استعمال کرنا ہے، تاکہ محکمہ دونوں اضلاع میں اپنا کام زیادہ مؤثر طریقے سے انجام دے سکے۔

    اجلاس کے دوران شرکاء نے میرپور اور بھمبر میں جاری ترقیاتی منصوبوں، واٹر سپلائی سکیموں، سرکاری عمارتوں اور گیسٹ ہاؤسز کا ان کی ضروریات سمیت جائزہ لیا۔ جائزے میں محکمے کی کارکردگی، بجٹ کی ضروریات اور دونوں اضلاع میں دستیاب افرادی قوت بھی شامل تھی۔

    اجلاس میں وزیر جنگلات کرنل (ریٹائرڈ) وقار احمد نور، وزیر اعلیٰ تعلیم اظہر صادق، چوہدری رخسار احمد، چوہدری محمد سعید اور سیکرٹری فزیکل پلاننگ و ہاؤسنگ شاہد محی الدین نے شرکت کی۔ شرکاء نے زیر غور منصوبوں کی پیش رفت اور ان پر عمل درآمد کو بہتر بنانے کے لیے درکار اقدامات پر تبادلہ خیال کیا۔

    اجلاس میں کیے گئے فیصلے میرپور اور بھمبر میں مستقبل کی واٹر سپلائی سکیموں پر لاگو ہوں گے، اور اب آبی وسائل کی تصدیق دونوں اضلاع میں کسی بھی نئی سکیم کے آغاز کے لیے لازمی شرط ہو گی۔