ایرانی وزیر خارجہ عباس عراقچی نے خطے میں کشیدگی کم کرنے کے لیے پاکستان کے مثبت کردار کا کھل کر اعتراف کرتے ہوئے پاک ایران تعلقات کو خصوصی اہمیت کا حامل قرار دیا ہے۔
آزاد اردو کے مطابق عراقچی نے یہ بات اسلام آباد میں وفاقی وزیر داخلہ محسن نقوی سے ملاقات کے دوران کہی۔ ایرانی وزیر خارجہ اقتصادی تعاون تنظیم (ای سی او) کی وزرائے خارجہ کونسل کے 30ویں اجلاس کے لیے پاکستان کے دورے پر ہیں۔
دونوں رہنماؤں کے درمیان دوطرفہ تعلقات، باہمی تعاون کے فروغ اور خطے کی تازہ ترین صورتحال پر تفصیلی تبادلہ خیال ہوا۔ دونوں ممالک نے علاقائی تنازعات کے حل اور امن و استحکام کے لیے سفارتی کوششیں جاری رکھنے پر اتفاق کیا۔
عراقچی نے علاقائی کشیدگی میں کمی کے لیے پاکستان کے مثبت کردار کو سراہتے ہوئے کہا کہ ایران پاکستان کے ساتھ اپنے تعلقات کو خصوصی اہمیت دیتا ہے۔ انہوں نے کہا کہ دونوں ممالک خطے میں امن کے لیے مل کر کام جاری رکھیں گے۔
سفارت کاری ہی واحد راستہ
ملاقات میں علاقائی امن و استحکام کے لیے مشترکہ اقدامات اور خطے میں جاری کشیدگی کم کرنے کے امکانات بھی زیر بحث آئے۔
محسن نقوی نے کہا کہ پاکستان تنازعات کے حل کے لیے سفارتی محاذ پر مخلصانہ کوششیں جاری رکھے گا۔ انہوں نے اس عزم کا اظہار کیا کہ خطے میں امن کے قیام کے لیے سفارتی رابطوں اور کوششوں کا سلسلہ برقرار رکھا جائے گا۔
ملاقات میں پاک ایران تعلقات کو مزید مضبوط بنانے اور مختلف شعبوں میں اشتراک کار بڑھانے پر بھی گفتگو ہوئی۔ دونوں جانب سے باہمی دلچسپی کے امور پر قریبی رابطہ برقرار رکھنے اور باقاعدگی سے مشاورت جاری رکھنے پر اتفاق کیا گیا۔
بعد ازاں وفاقی وزیر داخلہ محسن نقوی نے ایئرپورٹ پر ایرانی وزیر خارجہ عباس عراقچی کو الوداع کیا۔ اس موقع پر پاکستان میں تعینات ایرانی سفیر رضا امیری مقدم اور دیگر متعلقہ حکام بھی موجود تھے۔
عراقچی ای سی او وزرائے خارجہ کونسل کے اجلاس میں شرکت کے لیے اسلام آباد پہنچے ہیں، جس کی صدارت 2026-27 کے لیے پاکستان کر رہا ہے۔ اجلاس کے موقع پر انہوں نے نائب وزیراعظم و وزیر خارجہ اسحاق ڈار سے بھی ملاقات کی، جنہوں نے کہا کہ دونوں جانب نے پاک ایران تعلقات مزید مضبوط بنانے پر اتفاق کیا ہے۔
پاکستان حالیہ مہینوں میں امریکہ اور ایران کے درمیان ثالثی کا کردار ادا کر رہا ہے، اور اسلام آباد بارہا کہہ چکا ہے کہ مذاکرات اور سفارت کاری ہی زیر التوا مسائل کے حل اور کشیدگی کی روک تھام کا واحد قابل عمل راستہ ہیں۔ اسلام آباد میں ہونے والی ملاقاتیں اسی جاری سفارتی رابطے کا حصہ ہیں۔
ایرانی وزیر خارجہ نے ای سی او وزرائے خارجہ کونسل کے اجلاس کی کامیاب میزبانی پر پاکستان کو مبارکباد دی اور اجلاس میں ہونے والی مفید مشاورت، پرتپاک مہمان نوازی اور بہترین انتظامات کو سراہا۔




