پاکستان نے شام کی سرزمین پر اسرائیل کے جاری حملوں اور دراندازی کی سخت مذمت کرتے ہوئے خلاف ورزیوں کو فوری طور پر روکنے اور مقبوضہ علاقوں سے اسرائیلی افواج کے انخلا کا مطالبہ کیا ہے۔ یہ موقف اقوام متحدہ میں پاکستان کے مستقل مندوب سفیر سید حیدر شاہ نے شام کی سیاسی اور انسانی صورتحال پر سلامتی کونسل کے اجلاس سے خطاب کرتے ہوئے پیش کیا۔ اپنے خطاب میں سفیر شاہ نے کہا کہ یہ دراندازی رک جانی چاہیے اور اسرائیلی افواج کو مقبوضہ علاقوں سے بغیر تاخیر کے نکل جانا چاہیے۔
سفیر شاہ نے زور دیا کہ بین الاقوامی قانون کے تحت مقبوضہ گولان کی پہاڑیاں شام کا حصہ ہیں۔ انہوں نے اسرائیل پر زور دیا کہ وہ 1974 کے معاہدہ علیحدگی اور سلامتی کونسل کی متعلقہ قراردادوں پر مکمل عمل کرے، اور خبردار کیا کہ مسلسل خلاف ورزیاں شام کی سلامتی کو نقصان پہنچا رہی ہیں اور بحالی کی کوششوں میں رکاوٹ بن رہی ہیں۔ انہوں نے کہا کہ معاہدے اور سلامتی کونسل کی قراردادوں کا احترام استحکام کے لیے ضروری ہے۔
انہوں نے شام کی سیاسی منتقلی، تعمیر نو اور استحکام کی بحالی کی کوششوں کے لیے پاکستان کی حمایت کا اعادہ کیا۔ انہوں نے کہا کہ شامی حکومت کی جانب سے کی گئی پیش رفت بین الاقوامی سطح پر تسلیم اور مسلسل حمایت کی مستحق ہے۔ انہوں نے عالمی برادری سے اپیل کی کہ وہ شام کی تعمیر نو اور پائیدار استحکام کی کوششوں میں اس کا ساتھ دے۔
سفیر شاہ نے شام پر عائد اقتصادی پابندیوں میں نرمی کے لیے امریکہ، یورپی یونین اور برطانیہ کی جانب سے اٹھائے گئے اقدامات کا خیرمقدم کیا۔ انہوں نے کہا کہ ان اقدامات سے شام میں سرمایہ کاری، تعمیر نو اور معاشی بحالی کے مواقع پیدا ہوئے ہیں، اور پابندیوں میں نرمی شام کی معیشت کی بحالی میں مدد کا اہم قدم ہے۔
انہوں نے زور دیا کہ شامی عوام کے حالات زندگی بہتر بنانے کے لیے مسلسل بین الاقوامی رابطہ، انسانی امداد اور معاشی تعاون ضروری ہے۔ انہوں نے کہا کہ عالمی برادری کی مسلسل حمایت سے شام کی تعمیر نو، استحکام کی بحالی اور عوام کی روزمرہ زندگی بہتر بنانے میں مدد ملے گی۔




